RIJIYA GABA DUBU COMPLETE BY ABDULAZEEZ SANI MADAKIN GINI
RIJIYA GABA DUBU COMPLETE BY ABDULAZEEZ SANI MADAKIN GINI
Www.bankinhausanovels.com.ng BOOK 1
Saurayin gudu yake iya karfinsa acikin dajin domin ya
ceci rayuwarsa,
.
yana gudu yana waigen bayansa cikin
tsananin tsoro,amma baya ganin komai kuma baya
jin sautin komai face na masifaffun karnukan dake
biye dashi.
.
Su dai wadan nan karnuka sun kai guda saba in da
doriya kuma sun kasance jibga jibga tamkar ba
karnuka bane kai kace kurayene sabo da girmansu da
kwarjininsu gami da ban tsoro,musamman aka
kiwata wadan nan karnukan kuma aka basu horo na
musamman domin suyi gadin babban kurkuku na
birnin Kisra.
.
A tarihin birnin na kisra tunda aka gina kurkukun
tsawon shekaru arba in ba ataba samun fursuna da
ya taba guduwa daga cikin sa ba sabo da karfin
tsaron da ke cikinsa sai wannan saurayi wanda ake
kira IMHAL IBN IMZANU,
.
sabo da tsananin karfin
gudun Imhal ne ya baiwa karnukan tazara ta kimanin
taku sittin amma sabo da nacin karnukan da mugun
horon da suka samu sai gashi sun fara hango shi,nan
fa suka kara kaimi,nan fa Imhal ya kara kaimin
gudunsa alokacin da ya waigo ya hango su yaci gaba
da falfala azababben gudu ta cikin kwazazzabai da
sarkakiya,
sabo da karfin gudun ma har tashi sama
yake yana tsallake duwatsu da karyayyun bishiyoyin
da suka fadi kasa
.
Shi dai Imhal gudun kawai yake yi acikin dajin amma
baisan inda yake dosa ba,sabo da baisan ma a inda
yake ba bare ma yasan hanyar da ya kamata yabi, a
duk sanda ya tuno da bakar wahalar da ya sha kafin
ya sami nasarar guduwa daga kurkukun sai ya kara
kaimin gudun nasa yana mai ayyanawa a ransa da dai
a kamasa a raye a mai dashi cikin kurkukun gwara a
sami gawarsa sabo da azabar da take cikin kurkukun
ta wuce tunanin mai tunani.
.
Asalin Imhal bin Imzanu mutumin birnin misira ne
kuma shi ba dan kowa bane kuma bai aikata laifin
komai ba,mahaifinsa wani makiyayi ne mai kiwon
dabbobi a daji,don haka rayuwar Imhal gaba daya a
cikin daji take,sai dai a karshen kowane sati ranar
Lahadi sukan shiga cikin gari suyi dan siye-siyen su
sannan su koma daji inda suka gina bukkarsu.
.
Imhal ya taso da Jarumtaka juriya da iya
farauta,sanan komai yawan dabbobi idan ya tafi kiwo
dasu yana iya sarrafa su
.
Lokacin da Imhal ya fara girma ya cika shekaru goma
sha shida ne ya tambayi mahaifinsa tsoho Imzanu
yace ya kai Abbana me yasa baka taba bani labarin
mahaifiyata ba?ban santa ba kuma bansan yanda
akayi ta mutu ba kullum sai kace dani kawai mutuwa
tayi,kayi sani cewa yanzu ni ba yaro bane karami na
mallaki hankalin kaina yakamata ka sanar dani
gaskiyar al amari,
koda tsoho Imzanu yaji wannan
batu sai hankalinsa ya dugunzuma ainun yayi shiru
yana mai sunkui da kansa kasa,kawai sai idanunsa
suka ciko da kwalla hawaye ya fara zubowa kas,
a sannan ne ya dago kai ya dubi Imhal yace yakai dana
kasani yau ka tambayeni wani sirri wanda dama nayi
alkawarin bazan sanar dakai ba sai bayan ka mallaki
hankalinka,don kada hankalinka ya dugunzuma
kwakwalwarka ta kasa daukar al amarin, koda imzanu
yazo nan a zancensa sai ya sake yin shiru kamar bazai
iya cewa komai ba,da kyar ya sake dago kai ya dubi
Imhal muryarsa na rawa yace ka gafarceni yakai dana
bisa abinda zaka ji daga bakina yanzu domin zakayi
matukar mamaki kuma zai iya girgiza ka,maganar
gaskiya ita ce ni ba mahaifinka bane na jini,koda jin
wannan batu sai zuciyar Imhal ta buga da karfi,nan
take idanunsa suka kada sukayi jawur,bai san sanda
hawaye ya zubo masa ba yace yanzu idan ba kaine
mahifina ba to wanene? Bansan kowa ba a rayuwata
sai dai kai kadai,
kaine kasan cina da shana tundaga
kuruciyata har izuwa yanzu,me yasa uban nawa ya
gujeni ya barni a wajanka cikin daji inda babu jin
dadi da tsaro?
.
lallai kuwa ashe babu soyayya tsakani
na da uban nawa tunda bai damu da rayuwata ba.
Koda Imhal yazo nan a zancensa sai tsoho imzanu ya
zubar
da hawaye sannan yace
Ni kaina bansan waye
mahaifinka ba,ka saurara dakyau kaji labarin da zan
baka yanzu,
wata kila idan kaji labarin zuciyarka tayi
sanyi ka rungumi kaddara a bisa halin da ka tsinci
kanka a ciki
……. ..¤¤¤¤¤¤¤
Wata rana da safe na fito kiwo acikin dajin nan ina
kada dabbobi na sai kawai na hango wasu mutane
bisa keken doki sanye da bakaken tufafi kuma sun
rufe fuskokinsu su biyu sun nufi bakin wani katon
rami mai zurfi da fadin gaske,cikin hanzari na kada
dabbobina izuwa cikin duhuwar bishiyoyi nima na
sami wuri na buya,
dama wadannan mutane basu
ganni ba,ina nan labe cikin duhuwa sai naga
wadannan mutane sun fiddo gawar wata mace daga
cikin keken dokin sun cillata cikin wannan
ramin,
kawai sai suka shiga cikin keken dokinsu da
sauri suka fice daga cikin dajin gaba daya,sai da na
tabbatar da cewa sunyi nisa da tafiya kuma babu
alamar cewa zasu dawo sannan na ruga izuwa bakin
wannan ramin na leka cikinsa kawai sai naga ashe
wata kyakkyawar mace ce aka yanka ta har a sannan
jini na bulbulowa daga cikin makogwaronta kuma
tana dauke da tsohon juna biyu,nan take naji na
kamu da tsananin tausayinta,
.
don haka sai na yanke
shawarar na shiga cikin ramin na dauko gawar
wannan mata domin na suturta ta sosai na haka
kabari mai kyau na binne ta,idan ma na barta acikin
ramin zata rube ne warinta ya dameni tunda ramin
yana kusa da inda bukkata take,nan fa na fara tunanin
dabarar da zanyi na iya shiga cikin wannan rami har
na iya dauko gawar,sai da nayi tunani na tsawon ‘yan
dakiku sannan dabara ta fado mini,kawai sai na ruga
da gudu izuwa cikin bukkata,na dauko igiya mai tsawo
sannan na dawo bakin ramin,na daura igiyar a jikin
wata bishiya na wurgata cikin ramin sannan na kama
igiyar ina binta ina shiga ramin,sannu a hankali na isa
kasan ramin,koda naje kan gawar na duba ta sai naga
ashe da ranta bata mutu ba domin numfashinta na
fita kadan-kadan,cikin gaggawa na sunkuci wannan
mace na goya ta a bayana na daureta tamau,na sake
kama igiyar nayi iya kokarina na fito daga cikin ramin
goye da matar a baya na,hankalina a
dugunzume,sauri nake kawai na jarraba ceto
rayuwarta,ina fita daga cikin ramin na ruga da ita
izuwa cikin bukkata,na shimfide ta a kasa sannan nayi
sauri na dauko allura da zarin dinke fata na dinke
raunin wuyanta sannan na shafa magani akan
raunin,A sannan ne na kara hancina a dai dai hancin
matar don naji ko tana yin numfashi,amma sai naji
shiru alamar babu rai a jikinta,nan fa bakin ciki ya
lullube ni naji kamar na fashe da kuka sabo da
takaici,gashi nasaa wahalar dauko ta daga cikin
wannan ramin mai zurfi har ma tafin hannuwana sun
dade saboda kama igiya,cikin sanyin jiki na mike na
sunkuya da nufin daukar gawar na fita da ita waje
inda zan binne ta,kawai sai naji tayi tari,numfashinta
ya dawo,nan take murna ta kamani na ruga na dauko
wani ruwan magani na dura mata a baki dakyar tasha
mukurwa uku,jin kadan sai idanunta suka bude
dakyar,koda tayi arba dani sai naga ta firgita ta
yunkura zata tashi amma sai na danne kafadunta na
hana ta tashi,matar ta budi baki da nufin tayi magana
sai ta kasa,kawai sai naga tana dariya,wani lokacin
kuma sai ta hade fuska ta kama kuka tana fisgefisge,nan fa na gane lallai wannan mata ta samu tabin
hankali,al’amarin da yayi matukar bakanta raina
kenan domin naso ace ta iya yin magana acikin
hankalinta,domin na tambayeta ko ita wacece da
kuma wadannan mutane da suka kawo ta dajin acikin
keken doki a matsayin gawa,abinda zuciyata ta aiyana
min shine in ma basu bane to sun san wanda ya
kasheta,kuma akwai wani boyayyen al’amari akan
kisan nata,daga wannan rana naci gaba da jinyar
wannan mata har tsawon kwana ashirin da daya,A
tsawon wadannan kwanaki kullum a kwance take
kuma koda tayi yunkurin mikewa zaune sai ta kasa
sabo da raunin da yake makogwaronta,haka kuma
bata taba yin magana ba sai fisge-fisge da dariya
irinta mahaukata,abinci kuwa sai dai na dura mata
abaki tana ci tana kuka sabo da ciwo,da yake naga
tana dauke da juna biyu sai na dinga yawan bata
madarar shanu gami da abincin da yake gina jiki
domin abinda ke cikinta ya samu cikakkiyar lafiya,a
kwana a tashi har wannan mata ta shafe wata uku cur
a wajena,a sannan ne raunin makogwaronta ya
warke sumul har ya zamana cewa tana iya magana
sosai,amma a koda yaushe babu magana ta hankali
da nutsuwa a tare da ita sai maganganu irin na
mahaukata,nayi iya kokarina akan ta gayamin ko ita
wacece,daga inda take da kuma yadda akayi ta shiga
wannan hali sai tayi ta kyalkyala mini dariya,ganin
hakane yasa tausayinta ya karu a zuciyata,sau bakwai
ina nemo masana ilimin maganin mahaukata,wato
likitocin mahaukata suna zuwa su dubata kuma su
bata magani,amma duk a banza lafiya taki
samuwa,sau tari matar takan sulale ta nausa cikin
daji bansani ba,sai nasha wahalar nemota,bisa
wannan dalilin ne ma duk sanda zan fita kiwo ko
farauta sai na tafi tare da ita,wato na daina barinta a
gida.
Lokacin da cikinta ya tsufa sai tafiya da ita kiwo ko
farauta ya gagara,don haka nima sai na hakura da
zuwa ko ina,na tanadi abincina da na dabbobi na mai
yawa wanda zai kai tsawon kwana arba in,Ai kuwa
adaren kwana na talatin da bakwai nakuda ta kama
wannan mata acikin tsakiyar dare.Al’amarin da yai
matukar dugunzuma hankalina kenan tunda babu
halin in ruga cikin gari in nemo ungozoma,Da yake na
taba shiga irin wannan hali da nake tare da matata
wacce ta rasu a wajen haihuwa abinda ta haifa ma
yazo a mace,sai na shiga taimakon wannan mata,nine
na yankewa jaririn cibiya,na wanke shi sannan na
kimtsa mahaifiyar tasa,matar taci gaba da rainon
jaririnta tana shayar dashi ni kuma ina cigaba da fita
farauta da kiwona ina barinsu a gida,har tsawon
shekara daya da wata bakwai muna tare sannan
yaron ya fara tafiya da kafafunsa.
Kwatsam wata rana naje kiwo na dawo sai na nemi
wannan mata sama da kasa na rasa,kuma ga dannan
ta bar shi acikin bukka a zaune shi kadai yana ta tsala
kuka,cikin dimaucewa na dauki yaron na gaya shi a
bayana sannan na bazama neman wannan mata
wacce ko sunanta ban saniba bare na dinga kwalla
mata kira,Abu kamar wasa sai da na shekara daya da
wata tara ina nemanta amma ko alamunta ban gani
ba acikin wannan daji.A tsawon wannan lokacin ni
nake kula da wannan yaro da ta haifa dare da rana,ya
zama cewa na shaku dashi ainun shima haka
.Kwatsam wata rana da yammaci ina wasa da yaron a
kofar bukkata kawai sai na hango wannan mata daga
can nesa ta durfafo bukkata,cikin alamun tsananin
mamaki na mike tsaye na zuba mata idanu,matar ta
rame matuka,kuma duk rigar jikinta ta
yayyage,sannan tayi baki sabo da wahala da
kazanta,koda ta iso daf dani ta dubeni sai ta fashe da
kuka ta durkusa kasa bisa gwiwoyinta tana mai
neman gafarata tamkar mai cikakken hankali,nan take
naji na kamu da tsananin tausayinta don haka sai na
kama kafadunta na tasheta tsaye kuma na rungumeta
a kirjina a karon farko tun haduwa ta da ita,ita kuma
sai ta kankame ni ta da da fashewa da kuka,kawai sai
na janye jikina daga nata na dubeta nace me yasa
kika gudu kika barmu?shin kin manta ne cewa kin bar
danki a hannu na?koda jin haka sai matar ta dubi dan
nata ta girgiza kai tace ai ni kananin yaro na bar maka
bai kai wanan girma ba,da jin haka sai nayi dariya
nace to ai kullum mutum dada girma yake har yanzu
baki gaya min inda kika tafi ba kika barmu,Matar ta
bushe da dariya sannan ta hade fuska tace shan iska
na tafi na sake dawowa.Cikin tsananin damuwa nace
yau shekara hudu kenan muna tare baki taba gaya
min sunanki ba kuma baki gaya min sunan garinku ba
bare nasan asalinki da danginki shin bakya tausayin
wannan yaron da kika haifa ne?Koda jin wannan
tambaya sai matar ta sake bushewa da dariya tace
bansan kaina ba kuma bansan kowa ba sai kai,tana
gama fadin haka ta juya ta shige cikin bukka taje ta
kwanta ta kama bacci,tun daga wannan rana muka ci
gaba da zama tare,amma ko kadan wannan da nata
bai dameta ba,kuma bata yi masa komai sai dai ni
nayi masa,wani lokaci sai naga kamar hankalinta ya
dawo tana magana a nutse,amma da zarar na fara
tambayarta asalinta da garinsu sai ta birkice ta koma
hauka.
Wata biyu da kwana uku mukayi tare ranar kwana na
ukun ne matar ta wayi gari da tsananin rashin lafiya
wadda bansan sanadinta ba,cikin rudewa na shiga
hada mata magunguna iri-iri ina bata tana sha amma
duk a banza tamkar kara mata ciwon akeyi,kawai sai
naga idanunta sun fara lumshewa kuma numfashinta
na sarkewa,Al amarin da ya dugunzuma hankalina
kenan na fara zubar da hawaye,na shiga yi mata
tambayoyi akan ta sanar dani asalinta,matar na
kokarin bude baki tayi magana amma sai ta kasa,nan
take jikinta ya sandare,idanunta suka kafe ta daina
motsi.koda naga haka sai na rungumeta na fara
kuka,ganin ina kuka ne dannata wannan yaro dan
shekara kusan hudu ya rugo izuwa kaina shima ya
fashe da kuka.Hakika wanan rana nayi kuka mai yawa
sabo da shakuwar da nayi da matar nan sai da nayi
kwana ashirin da daya bana iya cin abinci
sosai,amma koda yaushe hankalina yana kan wannan
yaron ina kula da lafiyarsa sosai.
Koda tsoho Imzanu yazo nan a zancensa sai Imhal ya
tari numfashinsa suka dubi juna a lokacin da
kowannensu yake zubar da hawaye yace yakai
Abbana na gane cewa wannan yaro da mahaukaciya
ta haifa ba wani bane face ni dinnan,tabbas yanzu na
tabbatar da cewa ni marayane wanda bashi da uwa
bashi da uba kuma wanda baisan asalinsa ba,koda
Imhal yazo nan zancensa sai tsoho Imzanu ya
rungumesa suka fashe da kuka tare,can sai Imhal ya
janye jikinsa suka fuskanci juna ya dubi Imzanu yace
Bazan taba yarda bani d uba ba amma ni kai na sani
a matsayin ubana,ina son nayi maka wata tambaya
guda daya menene dalilin da yasa kake kirana da
suna IMHAL?
.
WASA FARIN GIRKI
BOOK 2
Da isar saiyaru cikin gidan kurkukun bayan ya wuce
kofofi goma sha daya sai ya wuce kai tsaye izuwa
dakin tuhuma yana ta murmushin mugunta,da isar sa
kofar dakin sai masu gadin dakin suka rusuna suka
gaishe shi,ko kallon su bai yi ba ya daka musu tsawa
yace Maza ku budemini kofar da sauri na shiga,cikin
hanzari daya daga cikin masu gadin yasa kuba ya
bude kofar ya kunna kai,ashe wadannan masu gadin
duk na bogi ne acikin shigar kayan dakaru suna daga
cikin dakaru guda ashirin din da Imhal suka zaba
domin su taimaka musu wajen samun nasarar
guduwa daga kurkukun.Da shigar saiyaru cikin dakin
sai yayi arba da Zauwadu zaune akan kujerar da aka
saba dora masu laifi an daure hannayensa da
kafafunsa da sarkoki ga badakare daya a tsaye akansa
yana dukansa da kulki har ya fasa masa baki da hanci
jini na suba.koda ganin haka sai saiyaru ya bushe da
dariyar mugunta sannan ya dubi badakaren yace
dakata haka yanzu kuma nine zanyi masa tawa
azabar,ya kai Zauwadu kayi sani cewa yau ne ajalinka
zai tabbata a hannnuna tunda har ka karya dokata ka
sake haddasa fada tsakanin fursunoni,hakika yau
gawrka rabon kifayen dake cikin teku ne.yana gama
fadin haka sai ya daga kulkinsa ya nufi Zauwadu da
nufin ya buga masa a kansa,ba zato ba tsammani sai
kawai wannan badakaren dake tsaye ya shammaci
saiyaru ya maka masa kulki akan kunnensa na
hagu,take saiyaru ya sulalae kasa sumamme.Koda
saiyaru ya farfado sai ya tsinci kansa a zaune akan
kujera wacce ake dora fursunoni idan za a yi musu
azaba an daure hannayensa da kafafunsa ta
baya,Imhal da Zauwadu na tsaye akansa sanye da
kayan dakaru,shi dai Zauwadu kayan saiyaru ya sanya
sannan ya sanyawa saiyaru nasa na fursunoni.Koda
saiyaru yaga haka sai ya tuntsire da dariyar mugunta
kuma ya turbune fuska yace kun bata lokacinku a
banza domin baku isa ku iya guduwa daga cikin gidan
nan ba,nan gidan mutuwa ne gidan da babu wani
fursuna da ya isa ya tsira da rayuwarsa koda kun
gudu sai an kamo ku an dawo daku idan ma sanyin
teku da halittun cikinsa basu hallaka ku ba.Koda
gama fadin haka sai saiyaru yaci gaba da kyalkyala
dariyar mugunta,cikin fushi Zauwadu ya daga katon
kulkin nan na saiyaru ya maka masa shi a ka,take kan
saiyaru ya fashe har kwakwalwarsa tayi fallatsi,koda
suka ga saiyaru ya mutu sai Imhal ya dubi Zauwadu
yace to fa yanzu duk nasarar mu tana hannunka duk
yadda za a yi kada ka kuskura ka bari a gane cewa kai
ba saiyaru banen,hatta muryarka sai ka karyar da ita
irin ta saiyaru tunda daman can kuna kama da juna a
fuska da yanayin jiki.Zauwadu ya risina ga Imhal yace
yakai abokina kuma shugabana a wannan gida na
darul maut,ina mai tabbatar maka cewa baza a taba
samun wata matsala ba daga gareni sai dai daga
sauran yan’uwanmu fursunoni guda ashirin wadanda
muka janyo cikin wannan aiki,ni dai alkawari daya
nakeso kayi mini,koda jin haka sai mamaki ya kama
Imhal yace wane alkawari kakeso nayi maka?koda jin
wannan tambaya sai Zauwadu ya sanya hannu acikin
aljihunsa ya dauko wata sarka ta dinare ya damkawa
Imhal a hannunsa yace,Wannan sarka ce ta matata
wacce muke tsananin son juna fiye da hangen mai
hange,a ranar da aka daura aurenmu da ita acikin
birnin kisra dakarun sarki Gurzalu suka zo su dubu
uku suka rufeni da masifaffen duka har sai da suka
sumar dani,ina ji ina gani aka Rabani da amaryata
SUHAILA aka sa mini sarka a wuyana,hannayena da
kafafuna aka tafi dani suhaila tana kuka da
ihu.Wannan shine asalin rabuwata da suhaila yau
tsawon shekaru ashirin da bakwai kenan,suhaila na
raye ko ta mutu ban saniba.ina son duk sanda ka
dawo cikin birnin kisra komai dadewa ka nemi
suhaila a unguwar Sharkas ka bata wannan sarka
idan har na rasa rayuwata a kokarin guduwarmu
daga nan,idan kuma na tsira da rayuwata to zan karbi
sarkata domin nayiwa suhaila alkawarin cewar indai
ina raye komai daren dadewa sai na dawo gareta
,amma idan ta ga an kawo mata sarkarta to bana
raye.Koda Zauwadu yazo nan a zancensa sai hawaye
ya zubo masa,Al’amarin da ya karya zuciyar Imhal
kenan shima yaji ya kamu da tausayin Zauwadu har
kwalla t acika masa idanu,nan take dai suka fito daga
cikin dakin tuhuma Imhal ya sanya sarkar suhaila a
cikin aljihunsa suka kullo kofar dakin ,masu gadin
dakin mutum biyu suka rufa musu baya.
Duk ta inda su Zauwadu suka zo wucewa sai ka ga
ana gaishe su sabo da ana zaton saiyaru ne,hatta
muryar Zauwadu ta amsa gaisuwar sai ta zama iri
daya sak da ta saiyaru,su kansu su Imhal sai da suka
cika da tsananin mamaki bisa yadda suka ji Zauwadu
ya iya mayar da muryar tasa haka,haka dai suka
cigaba da tafiya har suka iso dakin da ake ajiye
gawarwakin fursunonin mutum hudu da suka mutu a
sanadiyyar fadan da akayi a dakin cin abinci,kawai sai
Zauwadu ya bada umarni a debo gawarwakin a dora
su akan amalanke domin a futar dasu gaba daya daga
gidan a watsa a teku,nan take kuwa dakaru suka cika
wannan umarni daya bayan daya fursunonin nan
guda ashirin abokan aikin su Imhal suka dinga
shigowa cikinsu suna take musu baya.dama su duka
sunyi shigar dakarun gidan kurkukun,haka dai su
Imhal suka cigaba da tafiya acikin kurkukun suna tura
amalanken gawa ana bude musu kofofi,duk inda suka
zo da zarar anga saiyaru akan gaba sai kaga anbude
musu kofa da sauri har suka shige ta cikin kofofi
goma sha biyu na kurkukun kuma duk kofar da suka
fita sai an mai da ita an rufe.
Suna fitowa daga cikin kofa ta karshe sai suka yi arba
da dandazon dakarun dake tsaron gidan kurkukun,a
gefe daya kuma ga jirgin ruwa da ma’aikatan
kurkukun ke shiga idan zasu je karbo abinci ko wani
kaya acikin birnin kisra.Su dai masu gadin kurkukun
dakaru ne kimanin guda dubu arba’in,kuma ko
yaushe acikin shirin yaki suke dauke da muggan
makamai,koda suka yi arba da juna tsakanin su Imhal
da masu gadin sai aka tsaya ana kallon-kallo,in ba
don ma shugaban dakarun ya hango saiyaru akan
gaba ba da tuni ya baiwa yaran nasa umarni su afka
musu.
Cikin karamar murya Imhal ya matso daf da Zauwadu
yace dashi kada ka kuskura ka matsa kusa da dakarun
can,domin sai shugabansu ya gane cewa kai ba
saiyaru bane,daga nan zaka yi musu magana ka gaya
musu cewa zamu tafi watsa gawar fursunoni ne
teku.Koda jin wannan umarni sai Zauwadu ya daga
murya ya dubi shugaban dakaru yace ya kai Murwatu
kayi sani cewa yau an samu mutuwar fursunoni har
guda hudu,sabo da haka ina son ku bani jirgi na zuba
su a ciki sai na isa tsakiyar teku sannan na zubar dasu
domin na tabbatar da cewa sun zama abincin kifayen
ruwa.Koda jin wannan batu sai Murwatu ya turbune
fuska ya dakawa saiyaru tsawa yace,Kai saiyaru sabo
dame yau zaka zo mana da sauyin yanayin aiki? A
aikin tarihin gidan nan tsawon shekaru arba’in da
kafuwarsa ba a taba yin hakan ba,duk fursunan da ya
mutu daga nan ake jefa gawarsa cikin tekun,idan
baza ku iya jefa gawarwakin ba daga nan to fa sai dai
ku hakura ku koma da gawarwakin ku,duk wanda yayi
wani yunkuri cikin ku kuwa zamu far masa.
Koda jin wannan batu sai hankalin su Imhal ya
dugunzuma ,suka rasa abinda ke musu dadi domin
ga dukkan alamu sun sha wahalar banza kenan bisa
duk irin kokarin da sukayi suka samu nasarar fitowa
har kofar karshe ta gidan kurkukun DARUL MAUT.
Cikin tsananin damuwa da karayar zuciya Zauwadu ya
dubi Imhal yace ya kai abokina yanzu mene abin yi?
Imhal yace Bamu da abin yi face mu yaki su Marwatu
ko mu ko su!
Cikin firgici Zauwadu yace Baka da hankali ne,ta yaya
mu ashirin da biyu zamu iya yakar dakaru dubu
arba’in?
Imhal yace bamu da wani zabi wanda ya wuce
hakan,ko dai mu yake su ko kuma mu jefa kanmu
acikin tekun nan mu hallaka shine kadai gatan da
zamu yiwa kanmu,ya kai abokina kai sani cewa
faduwar gaba asarar namiji ce,yau ne za muyi yaki da
dukkan karfinmu na jiki da karfin zukatanmu,ko
mutuwa mukayi mun bar abin fadi.Ko kuwa ka zabi ka
koma cikin darul maut a cigaba dq gana maka azaba
har ka mutu tunda kasan cewa ko kadan baza ayi
mana sassauci ba tunda mun kashe saiyaru?koda
Zauwadu da sauran fursunonin suka ji wannan batu
sai nan take suka ji dukkan tsoro ya kau daga cikin
zukatan su.
BOOK 3
Lokacin da jarumi Imhal da sadauki Darwaz suka
ruguntsume da azababben yaki a tsakiyar filin fadar
birnin misra wanda yan kallo sama da mutane
miliyan dari suka kewaye, sai filin ya cika da ihu da
shewar jama’a, nan fa kowa ya cika da mamakin
yadda Imhal ke iya kare hare-haren sadauki Darwaz
har yake mai da martani, sai da aka day lokaci mai
tsawo ana wannan artabu, daya daga cikin jaruman
biyu bai samu nasarar Koda kwarzanar jikin daya
ba,Al’amarin da yasa jikin sarki taryan yayi Dan sanyi
kenan, kuma ransa ya baci, bai San sanda ya mike
tsaye ba daga kan karagar sa ta mulki ya fara yiwa
jarumin sa kirari, abinda sarki taryan bai taba yiba
kenan a tarihin gasa da ake yi tsawon shekaru, Koda
sadauki Darwaz ya ga sarkin sa ya mike tsaye Daga
kan karagar sa yana Koda shi,sai ya fusata ainun ya
kara zage damtse iya karfin sa ya dinga kaiwa Imhal
Sara da suka da dukkan karfin sa,cikin wata irin
sabuwar jarumtaka mai tsananin zafin nama ta
BAZATO, Nan fa shima Imhal ya dinga yin iya kokarin
sa don kare kansa,amma sai ya zamana cewa dakyar
yake iya kare hare-haren, kuma baya iya mai da
martani, Koda ganin haka sai murna ta kama sarki
taryan ya dinga shewa, Ai kuwa sai jama’ar gari suma
suka dinga taya shi,ya zamana cewa babu mai yiwa
jarumi Imhal jinjina a filin, Duk abinda yake faruwa
sarki gurzalu yayi shiru yana guntun murmushi kawai
don yasan wanene Imhal, A gaba dayan filin gasar
babu wanda hankalin sa ya dugunzuma ainun bisa
ganin halin da jarumi Imhal ya shiga sama da
Gimbiya Shumaira, domin duk sanda taga an kai
masa wani mugun gari sai kaga ta kai da kai kamar
ita ake kaiwa, wani lokacin ma har mikewa take yi
tsaye zumbur! kamar zata kwalla ihu,ita kuwa
Gimbiya lamirat kawai tana kallon fadan ne,ba ta ma
San jarumin da take so ba acikin ranta, amma kuma
sanda ta tuno da bayanin da mahaifin ta sarki gurzalu
ya gaya mata cewar idan Imhal ya samu nasarar
lashe wannan gasar JARUMTA sai ya ga bayansu sai
ta ji ta tsani Imhal fiye da komai a duniya, domin
babu abinda take so sama da sarki gurzalu da
mahaifiyarta, ana cikin haka ne sadauki Darwaz ya
kara kuntata Imhal har ya matse shi a waje daya ya
hana shi matsawa, kuma ya cigaba da kai masa Sara
da suka na hauka ba sassauci, ai kuwa sai ya samu
nasarar dankara masa Sara a saman kirjin sa,take
Imhal ya kwalla ihu ya fadi kasa a lokacin da jini yayi
tsartuwa daga kirjin nasa, Koda Darwaz yaga Imhal
ya fadi kasa sai ya kai masa suka da takobi a ciki,
Cikin zafin nama Imhal ya goce ya doki marainansa
da kafa, kawai sai ji akayi Darwaz ya kurma uban ihu
ya fadi can gefe daya, a sannan ne Imhal ya mike
tsaye dakyar jini na zuba kirjin sa yana yin layi,Cikin
sauri ya cire wani yanki dake daure a goshin sa ya
daure raunin don ya rage zubar jinin, a sannan ne
Darwaz ya mike tsaye zumbur! ya kwarara uban ihu
bisa ganin ya samu nasarar yiwa Imhal rauni, A
sannan ne fa sarki taryan ya cigaba dakyakyata
dariyar mugunta, Koda suka had a idanu da sarki
gurzalu sai gurzalu yayi masa murmushin mugunta
ba tare da nuna karayar zuciya ba,Al’amarin da yasa
jikin sarki taryan yayi Dan sanyi, kuma ya daina
kyalkyala wannan dariyar muguntar,A wannan
lokacin Imhal ba karamin kokari yayi ba ya tsaya bisa
kafafunsa, don jiri ne yake dibarsa sakamakon jinin
da ke zuba daga kirjin sa kuma idanunsa suna
lumshewa yana gani dishi-dishi,Koda Darwaz ya lura
da irin halin da Imhal ke ciki sai ya bushe da dariyar
mugunta don yasan cewa yanzu ne zai gama da Imhal
farat daya.
Kawai sai Darwaz ya gyara tsayuwarsa, sannan
sannan ya sake zaro wata sharbebiyar adda a
bayansa wato ya hada makamai guda biyu a hannun
sa yana mai gyara tsayuwarsa gami da fuskantar
Imhal, A sannan ne fa filin gasar ya rude da shewar
jama’a, Attajiran da suke yin caca akan gasar suka
dinga yiwa junansu kirari, Kaso bakwai cikin kaso
goma na ‘yana cacar duk sadauki Darwaz suka zaba a
matsayin jarumin su,kaso uku ne kacal suka yi
kundunbala suka zabi Imhal, tun da ake yin caca a
wannan gasar ba a taba zuba kudade masu yawa ba
irin na bana,Da yawa Daga cikin attajiran da suka
shiga wannan caca idan ba jarumin su ne yaci gasar
ba karayar arziki tazo musu kenan.
Lokacin da jaruman biyu suka fuskanci juna, sai filin
gasar yayi tsit! aka zuba Ido don ya ga wanda zai yi
nasara, saboda ansan cewa wannan gamon da za ayi
na karshe ne, Koda Darwaz ya ga shima Imhal cike
yake da burin neman sa’a, sai ya budi baki ya karanta
wadansu Dalasumai na tsafi guda biyu, kawai sai
Imhal yaga wata irin gagarumar iska ta kanannadeshi
tasa ya kasa Koda daga hannun sa,ko matsawa daga
inda yake, kuma sai Darwaz ya rugo izuwa kansa yana
mai daga makamansa sama yana ihu, Abin al’ajabi
shine, babu wanda yaga wannan guguwa wacce ta
kanannade jarumi Imhal face sarki gurzalu, domin
shine kadai yake da karfin ganin sihirin tsafin
Darwaz,Imhal yayi iya kokarin sa akan ya kaucewa
guguwar ya kasa,Al’amarin da ya dugunzuma
hankalin sa ke nan yana ganin mutuwa muraran,
Koda sarki gurzalu yaga abin da ke shirin faruwa sai
yayi nuni da hannun sa izuwa kan guguwar da ta
kanannade Imhal don ya kawar da ita ,amma sai nasa
sihirin tsafin ya ki yin tasiri, Take ya tuna cewar ai Yau
ya manta bai dauro gurunsa na tsafi ba ya barshi a
can cikin wata akwati a dakin da aka sauke shi,nan
take bakin ciki ya rufe shi ya sunkuyar da kansa kas
yana mai rufe fuskarsa don baya son Darwaz ya
samu nasarar kashe Imhal, A dai-dai wannan lokaci
ne hankalin Shumaira ya dugunzuma ainun bisa
ganin za a hallaka jarumin da taji ta kamu da
tsananin sonsa a Yau dinnan kuma farat daya,kawai
sai ji tayi hawayen bakin ciki ya zubo mata.Gaba daya
attajiran da suka zabi Imhal a matsayin jarumin su
suka zuba kudin su na caca akansa sai jikinsu yayi
sanyi, suka ayyana cewar asara tazo musu tunda
gashi suna gani an durfafoshi da gudu za a sare
shi,amma ko motsi ya kasa yi,Koda ya rage bai fi taki
uku ba kacal Darwaz ya iso kan Imhal ba sai ya daka
tsalle sama da nufin ya sare kan Imhal da makaman
dake hannun sa,wato takobi da adda, Kwatsam!ba
zato ba tsammani sai Imhal yaji guguwar da ta
kanannadeshi ta sake shi ta bace bat!t take ya samu
damar sunkuyawa ya kaucewa harin da Darwaz ya
kawo masa ,makaman Darwaz din suka sari iska,
kafin Darwaz ya juyo da baya tuni Imhal ya soka
masa takobi a gadon baya, takobi ta burma gadon
baya ta fito ta cikin sa ,Darwaz ya kwarara ihu saboda
tsananin zugin sukan da akayi masa ,sannan ya fado
kasa yana shure-shuren mutuwa, Ai kuwa sai
attajiran da suka zabi Imhal a matsayin jarumin cacar
su suka kaure da ihu gami da shewar farin ciki,
Gimbiya Shumaira kuwa bata San sanda ta daka tsalle
ba sama don murna ta kama kyalkyala dariya, amma
tana hada ido da sarki taryan sai taga ya kame,
saboda tsananin mamaki da takaici, fuskarsa ta
murtuke babu alamar annuri ko kadan, Sarki gurzalu
da ‘yarsa Gimbiya LAMIRAT kuwa, suma sai farin ciki
ya lullube su suka kama yiwa Imhal tafi. Sauran ‘yan
kallo kuwa kamewa suka yi kamar gumaka saboda
tsananin mamaki bisa ganin yadda aka gama
dajarumi Darwaz farat!daya, duk da cewar babu
kamar sa a karfin damtse da karfin sihirin tsafi a
garin,shi kuwa jarumi Imhal yayi matukar mamaki
yadda akayi ya tsira daga sharrin wannan guguwar
tsafin, Haka ma sarki gurzalu yayi wannan mamaki,
kuma hankalin sa ya Tashi, ya fara tunanin cewa lallai
akwai wani ma’abocin tsafi da ya taimaki Imhal daga
cikin’yankallo,don haka ya zama wajibi yayi bincike
don ya gano ko wanene, nan take ya ayyana a ransa
cewar yana komawa turakar da aka sauke su zai
daura gurun tsafin sa don yayi binciken.Ana cikin
wannan halin ne aka ga jarumi Imhal ya yanke jiki ya
fadi kasa,Koda ganin haka sai Gimbiya Shumaira ta
yunkura za ta ruga izuwa cikin filin inda Imhal yake,
amma sai sarki taryan ya ruko hannun ta yana mai
daka mata harara, take ta shiga taitayinta ta sunkui
da Kanta kasa cikin alamun kunya.RIJIYA GABA DUBU
